UTANGULIZI

Kwa miaka yote sisi wanawake wa Tanzania tumekabiliwa na madhara yatokanayo na matumizi ya vidhibiti mimba pamoja na utoaji wa mimba. Wahamasishaji wa uzazi wa mpango kwa njia za kisasa wametueleza muda wote kuwa njia za uzazi wa mpango hazina madhara na kwamba pia zinasaidia kuzuia kupata baadhi ya magonjwa, kama vile saratani ya tumbo la kizazi na ya kokwa. Tunapohudhuria huduma za kliniki wahudumu wa afya wanatushawishi kutumia dawa za uzazi wa mpango ili kuepuka kuzaa katika muda mfupi mfupi. Na kwa sasa hivi serikali na mashirika ya hiari ya ndani na njeyanaendesha kampeni kubwa ya kutumia uzazi wa mpango. Watu mashuhuri wanatumika katika kampeni hii. Wapo wana-muziki wa kisasa, waimbaji wa nyimbo za Injili, wapo wafanya kazi na wengine wengi. Katika kampeni hii tunaaminishwa kuwa njia za uzazi wa mpango hazina madhara na zinafaa hata kwa wasichana. Rasimu ya “Uzazi Salama” iliyoandaliwa na kufadhiliwa kwa kiasi kikubwa na mashirika ya nje, nayo imetumia kurasa nyingi kuitaka serikali kutunga sheria ya kuwalazimisha wanawake watumie njia za kisasa za uzazi wa mpango.

Sisi wanawake wa Tanzania, ambao ndio watumiaji wa njia hizo za uzazi wa mpango kwa njia za kisasa tunapenda kueleza masikitikio yetu kuwa, badala ya faida tunazoahidiwa, njia hizo za uzazi wa mpango zimetuletea simanzi kubwa. Wengi wetu tumeathirika kwa namna moja au nyingine; baadhi yetu wamepoteza maisha kwa kukosa huduma baada ya kupata madhara makubwa yatokanayo na njia hizo. Wahudumu wa afya hawatuambii ukweli kuhusu uwezekano wa kupata madhara baada ya kutumia njia hizo. Badala yake tukipata madhara, tunaporudi kuwajulisha tunaambiwa ni maudhi madogo madogo tu na yatakwisha baada ya muda mfupi. Wengine wanatushauri kubadilisha njia, yaani kama tulitumia vidonge vya majira, tunashauriwa kutumia sindano ya depo provera. Kwa mtindo huo baadhi yetu tumejikuta tukitumia njia zote – vidonge, sindano ya depo provera, vipandikizi, vitanzi bila mafanikio. Badala yake tumeshuhudia madhara yakiongezeka kila tunapobadilisha njia ya uzazi wa mpango. Wahamasishaji wanatulaghai kwa matangazo mazuri bila kusema ukweli wote juu ya njia za uzazi wa mpango.

Sasa tunasema tumechoka. Tumetendewa kama vyombo vya majaribio. Kwa maumivu yetu tumeendela kuvinufaisha viwanda vinavyotengeneza madawa hayo; tumeendelea kuwaneemesha wahamasishaji na wauzaji. Tumefanywa vyombo vya starehe katika masuala ya ngono kiasi kwamba badala ya kutukomboa, tumeendelea kudhalilishwa. Katika hatua hii tunasema basi, hatuwezi kuendelea kuteseka kwa faida ya wengine.

Na sasa tunaazimia kuanzisha shirika litakalowajumuisha wanawake wote waliotumia vidhibiti mimba na ambao wamedhurika kutokana na vidhibiti mimba hivyo. Tunataka kuliambia taifa kuwa HATUTANYAMAZA KAMWE. Hatutaki kutumiwa tena kama vyombo vya biashara. Hasara tunazozipata kwa madhara tunayoyapata zinatufanya kuendelea kuwa maskini na wanyonge katika nchi yetu. Tunashindwa kuchangia vema katika pato la familia zetu na taifa letu kwa sababu muda mwingi sisi tunakuwa wagonjwa.

Tunashangaa viongozi wa taifa letu wanapuuzia njia zinazofaa kwa wanawake kutumia ili kuweka mpishano wa uzao, kama vile njia za maumbile au za asili. Njia hizi ambazo mabibi zetu walizitumia na kuzienzi katika miaka yao, leo hii zimetupwa kando kama vile hazifai kwa lolote. Bibi zetu walitumia njia hizi wakajihakikishia afya zao, wakawazaa wazazi wetu na wameendelea kuwa na afya njema hadi uzeeni. Wameishi miaka mingi wakitoa mchango mkubwa katika maendeleo ya nchi yetu. Njia hizi ambazo hazina madhara yoyote na zinaimairisha familia zetu, ndizo zinazopaswa kuhimizwa na viongozi wetu wa serikali na mashirika yasiyo ya kiserikali.

Katika shirika hili tunataka kuwajumuisha wenzetu waliotoa mimba kutokana na sababu mbalimbali. Tunataka nao washiriki katika jitihada zetu za kusema ukweli kwa uwazi, bila kufumbia macho madhara waliyoyapata kutokana na kujiingiza katika vitendo vya utoaji mimba. Vitendo vya utoaji mimba, licha ya kuleta madhara ya kimwili na kisaikolojia kwa wanawake, pia vimeleta vifo kwa baadhi ya wanawake ama kutokana na utoaji mimba mbaya, au kutokana na kutoka damu nyingi baada ya kutoa mimba. Baadhi ya wanawake wamebaki na ulemavu wa maisha. Licha ya hayo utoaji mimba husababisha taifa letu kupungukiwa na nguvu kazi, hata wataalamu na hata kupungua kwa idadi ya watu.

NA MAKAO MAKUU NA ANUANI:

Jina la lishirika litakuwa: “HATUTANYAMAZA KAMWE”
Makao makuu: yatakuwa Dar es Salaam
Anuani: hadi itakavyohitajika vinginevyo anuani yake itakuwa, S.L.P. 42749, Dar es Salaam

• MALENGO NA MADHUMUNI
  • Kuweka bayana madhara yote yatokanayo na matumizi ya vidhibiti na kufunga kizazi
  • Kuhamasisha kila mwanamke aliyetumia vidhibiti mimba na akapata madhara kupaza sauti yake kwa uwazi kama sehemu ya elimu kwa jamii
  • Kuhamasisha wahanga wa vidhibiti mimba kudai fidia kwa madhara waliyoyapata kutokana na kudanganywa
  • Kuhakikisha kwamba elimu juu ya madhara ya vidhibiti mimba inakuwa ya kudumu na inamfikia kila mwanamke kabla hajaamua kuvitumia
  • Kuilazimisha serikali na mashirika ya hiari yanayohamasisha matumizi ya vidhibiti mimba kuweka maelezo juu ya madhara yake
  • Kuwalazimisha wahudumu wa afya kutoa maelezo ya kina juu ya uwezekano wa madhara ya vidhibiti mimba kwa watumiaji
  • Kuishauri serikali kuhamasisha na kufundisha njia za maumbile za kuweka mpishano wa uzao kwa vile zimethibitika kuleta manufaa katika mtu binafsi na familia yake
  • Kuishauri serikali kufadhili programu za uzazi wa mpango kwa njia ya maumbile zinazoendeshwa na mashirika mbalimbali hapa nchini
  • Kuishauri Wizara ya Elimu kuingiza somo la uzazi wa mpango kwa njia ya maumbile katika mitaala ya vyuo vya ualimu na vyuo vingine vya juu
  • Kuishauri Wizara ya Elimu kufuta masomo yanayohimiza watoto wa shule kutumia vidhibiti mimba
  • Kumhamasisha kila mwanamke kuachana na njia za kisasa za uzazi wa mpango na badala yake wazingatie kutumia njia za maumbile katika kuweka mpishano wa uzao
  • Kushirikiana na mashirika yanayojishughulisha na uzazi wa mpango kwa njia ya maumbile ili kupata walimu wa kufundisha njia hiyo
  • Kushirikiana na mashirika ya kutetea uhai ili kuwezesha mipango ya kuwaondoa vitanzi na vipandikizi wanawake waliowekewa kwa kudanganywa
  • Kuendelea kufanya utafiti juu ya madhara zaidi ya vidhibiti mimba na kuyachapisha kwa lengo la kujenga uelewa mkubwa kwa watumiaji
  • Kutoa ushauri nasaha na uponyaji wa ndani kwa walioathirika na kutoa tiba kila inapowezekana

• Uanachama
  • Kila mwanamke aliyewahi kupata madhara kutokana na kutumia vidhibiti mimba anaruhusiwa kujiunga na shirika
  • Kila mwananke anayetumia sasa vidhibiti mimba anaweza kujiunga na shirika
  • Kila mwanamke anayefahamu madhara ya vidhibiti mimba na anataka kuwasaidia wanawake wenzake kwa njia ya kuwaelimisha anaweza kujiunga na shirika
  • Kila mwanamke anayepigania maendeleo ya kweli na ukombozi wa mwanamke anaweza kujiunga
  • Kila mwanamke anayezingatia mafundisho ya dini yake yanayokataza matumizi ya vidhibiti mimba anaweza kujiunga na shirika

• Haki na wajibu za mwanachama
  • Haki zake ni:
    • Kutoa mchango wa mawazo katika mikutano na mikusanyiko mingine
    • Kuchagua au kuchaguliwa kushika nafasi ya uongozi katika ngazi yoyote
    • Kusikilizwa mawazo/mchango wake katika masuala yanayolihusu shirika
    • Kusaidiwa kudai fidia kwa madhara aliyoyapata kutokana na vidhibiti mimba
  • Wajibu wake
    • Kulipa kiingilio cha uanachama kadiri itakavyopangwa na waanzilishi
    • Kulipa ada za kila mwaka kwa kadiri ya maamuzi ya mkutano mkuu
    • Kila mwanachama aseme kwa sauti na bila woga madhara ya vidhibiti mimba
    • Kumsaidia mwanamke mwenzako kusema yanayomsibu kuhusiana na vidhibiti mimba
    • Kujifunza na kutumia njia za maumbile katika kuweka mpishano wa uzao

• Uongozi
  • Shirika litaongozwa na Mkurugenzi atakayeteuliwa kutokana na wasifu wake
  • Shirika litakuwa na Halmashauri ya Taifa itakayoundwa na Waratibu wa Kanda
  • Shirika litakuwa na Halmashuri za Utendaji katika kanda saba kama ifuatavyo: Kanda ya Ziwa, Kanda ya Magharibi, Kanda ya Kaskazini, Kanda ya Kati, Kanda ya Mashariki na Kanda ya Kusini na Kanda ya Nyanda za Juu Kusini na kila kanda itaongozwa na Mratibu wa Kanda
  • Wanawake katika ngazi za chini wataungana kwa misingi ya au makazi yao au mahali pa kazi na wataongozwa na Kamati Tendaji katika ngazi hiyo
  • Shirika litateua wajumbe wasiozidi watano kuwa wadhamini. Wajumbe hao wateuliwe kutokana na wasifu wao wa kuwa watetezi wa kweli wa haki za mwanamke. Wajumbe hao wajulikane pia kuwa ni watetezi uhai na familia

• Njia za utendaji

Katika kufikia malengo yake, Shirika litatumia njia zifuatazo katika kufikisha ujumbe

• Warsha, semina na makongamano
• Kampeni za wazi kupitia vyombo vya habari, machapisho, na mikutano ya hadhara
• Kuandaa na kuendesha maandamano ya amani
• Uwakilishi katika ngazi mbalimbali

• Masuala ya fedha

Fedha za shirika zitapatikana kwa njia za:

• Kiingilio cha kila mwanachama
• Michango ya kila mwaka kutoka kwa kila mwanachama
• Miradi itakayobuniwa na shirika
• Ufadhili kutoka wahisani wa ndani na nje ya nchi